DK
DE
EN
Gazeta “Shpresa” – organ i komunitetit shqiptar në Danimarkë, doli në 7 numra gjithsejt, në vitet 1995-96, si rezultat i bashkëpunimit të Arben Çokaj me shoqatat shqiptare në Kopenhagë. Gazeta ishte në formën e një pamfleti prej 12-16 faqesh A4, dhe merrej me trajtimin e temave kombëtare dhe problemet që mund të shqetësonin komunitetin shqiptar atje.
Gazeta shtypej në shtypshkronjën e dispencave të Universitetit të Kopenhagës, nga Mevaip Jonuzi. Gazeta shpërndahej në lokalet e shoqatave shqiptare në Kopenhagë, ku numri i lexuesve ishte realisht mjaft i ulët, gjë që çoi edhe në ndërprerjen e botimit të saj pas numrit 7-të të saj, nëntor 1996, faqja e parë e së cilës paraqitet si ilustrim më poshtë.
Në kohën kur gazeta “Shpresa” botohej, kishte gjithsejt rreth 7 mijë shqiptarë në Danimarkë, ku shumica ishin shqiptarë të Maqedonisë, pjesa tjetër nga Kosova dhe rreth 16 shqiptarë nga Shqipëria.
